ಕರ್ನಾಟಕದ ಉದ್ದಗಲಕ್ಕೂ, ಕೈಗಾರಿಕಾ ಕಾರಿಡಾರ್, ಮೆಟ್ರೋ, ವಿಮಾನ ನಿಲ್ದಾಣ, ಟೌನ್ಶಿಪ್, ರಸ್ತೆ, ರೈಲ್ವೆ ಯೋಜನೆಗಳ ಹೆಸರಿನಲ್ಲಿ ಭೂಸ್ವಾಧೀನ ನಡೆಯುತ್ತಲೇ ಇದೆ. ಅಭಿವೃದ್ಧಿ ಬೇಕು ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಆ ಅಭಿವೃದ್ಧಿಯ ಬುಡದಲ್ಲಿ ಒಬ್ಬ ರೈತ ಕಣ್ಣೀರಿಡಬಾರದು ಎಂಬುದು ಕೂಡ ಅಷ್ಟೇ ನಿಜ.
ಇದು ಕೇವಲ ಒಂದು ವೆಬ್ಸೈಟ್ ಅಲ್ಲ — ಇದು ಕರ್ನಾಟಕದ ಪ್ರತಿಯೊಬ್ಬ ರೈತನ ಭೂಮಿ ಸಂಬಂಧಿತ ಹಕ್ಕುಗಳಿಗೆ ಒಂದು ಡಿಜಿಟಲ್ ದನಿ. ಮಾಹಿತಿ, ಕಾನೂನು ನೆರವು, ಸಂಶೋಧನೆ, ದಾಖಲೆ ಮತ್ತು ಪಾರದರ್ಶಕತೆ — ಎಲ್ಲವೂ ಒಂದೇ ವೇದಿಕೆಯಡಿ.
ನಾವು ಯಾರು ಎಂಬ ಪ್ರಶ್ನೆಗೆ ಉತ್ತರ ಸರಳ. ನಾವು ವಕೀಲರು, ಪತ್ರಕರ್ತರು, ಸಂಶೋಧಕರು, ವಿದ್ಯಾರ್ಥಿಗಳು ಮತ್ತು ರೈತ ಕುಟುಂಬಗಳ ಒಂದು ಸಮೂಹ. ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ ಆಗುತ್ತಿರುವ ಗೊಂದಲ, ಮಾಹಿತಿ ಕೊರತೆ ಮತ್ತು ಕೆಲವೊಮ್ಮೆ ಆಗುವ ಅನ್ಯಾಯದ ಆರೋಪಗಳನ್ನು ವರ್ಷಗಳಿಂದ ಗಮನಿಸುತ್ತ ಬಂದವರು.
ನಮ್ಮ ಗುರಿ ಯಾವುದೇ ಯೋಜನೆಯನ್ನು ವಿರೋಧಿಸುವುದಲ್ಲ. ಪ್ರತಿ ಯೋಜನೆಯೂ ಕಾನೂನಿನ ಚೌಕಟ್ಟಿನೊಳಗೆ, ಸಂವಿಧಾನದ ಆಶಯದಂತೆ, ರೈತನ ಘನತೆಗೆ ಧಕ್ಕೆಯಾಗದಂತೆ ನಡೆಯಬೇಕು ಎಂಬುದು.
ಇಂದು ಒಬ್ಬ ರೈತ ತನ್ನ ಭೂಮಿ ಸ್ವಾಧೀನ ಪ್ರಕ್ರಿಯೆಯ ಯಾವ ಹಂತದಲ್ಲಿದೆ ಎಂದು ತಿಳಿಯಲು ಕಚೇರಿಯಿಂದ ಕಚೇರಿಗೆ ಅಲೆಯಬೇಕಾದ ಸ್ಥಿತಿ ಇದೆ. ಇದನ್ನು ಬದಲಿಸುವುದೇ ನಮ್ಮ ಧ್ಯೇಯ.
ಯಾವ ರೈತನಿಗೂ, "ನನಗೆ ಗೊತ್ತಿರಲಿಲ್ಲ" ಎಂಬ ಕಾರಣಕ್ಕೆ ಹಕ್ಕು ಕಳೆದುಕೊಳ್ಳುವ ಸ್ಥಿತಿ ಬರಬಾರದು.
ಗೆಜೆಟ್ ನೋಟಿಫಿಕೇಶನ್ ಬಂದಿದೆಯೇ? ಇಲ್ಲಿ ನೋಂದಣಿ ಮಾಡಿಕೊಳ್ಳಿ. ನಿಮ್ಮ ಒಂದು ನೋಂದಣಿ ಕೇವಲ ಒಂದು ಫಾರ್ಮ್ ಅಲ್ಲ — ಅದು ನಿಮ್ಮ ಪ್ರಕರಣಕ್ಕೆ ಕಾನೂನು ಬೆಂಬಲ ಸಿಗುವ ಮೊದಲ ಹೆಜ್ಜೆ.
ನಿಮ್ಮ ವೈಯಕ್ತಿಕ ವಿವರ ಗೌಪ್ಯ (**** ಮರೆಮಾಚಲಾಗಿದೆ) — ಆದರೆ ನಿಮ್ಮ ಹಕ್ಕು ಸಾರ್ವಜನಿಕ.
ಒಬ್ಬ ರೈತ ಮೊದಲ ಬಾರಿಗೆ ನ್ಯಾಯಾಲಯದ ಮೆಟ್ಟಿಲು ಹತ್ತುವಾಗ ಆತನ ಮನಸ್ಸಿನಲ್ಲಿ ಇರುವುದು — ಇದು ನನಗೆ ಎಷ್ಟು ಖರ್ಚು ಮಾಡಿಸುತ್ತದೆ, ಎಷ್ಟು ವರ್ಷ ತಿನ್ನುತ್ತದೆ ಎಂಬ ಭಯ. ಆ ಭಯವನ್ನು ಹೋಗಲಾಡಿಸುವುದೇ ಈ ವಿಭಾಗದ ಕೆಲಸ.
ರೈತರ ಪರವಾಗಿರುವ ಪ್ರಮುಖ ಕಾನೂನು — ಬಹುತೇಕ ರೈತರಿಗೆ ಗೊತ್ತೇ ಇಲ್ಲದ ಅಂಶಗಳು:
ಭಾರತದಲ್ಲಿ ಭೂಸ್ವಾಧೀನಕ್ಕೆ ಸಂಬಂಧಿಸಿದ ಮಾಹಿತಿ ಎಲ್ಲೋ ಒಂದು ಕಡೆ ಕುಳಿತು ಸಿಗುವಂತಿಲ್ಲ. ಇದನ್ನು ಒಂದೇ ಸೂರಿನಡಿ ತರುವ ಗುರಿಯೊಂದಿಗೆ ಈ ವಿಭಾಗವನ್ನು ಕಟ್ಟುತ್ತಿದ್ದೇವೆ — ಸಂಶೋಧಕರಿಗೆ, ವಿದ್ಯಾರ್ಥಿಗಳಿಗೆ, ವಕೀಲರಿಗೆ ಉಪಯುಕ್ತವಾಗುವಂತೆ.
ನಿಮ್ಮೆಲ್ಲರ ಅನುಭವವೇ ಈ ಚಳುವಳಿಯ ಬೆನ್ನೆಲುಬು. ನಿಮ್ಮ ಸಮಯ ನೀಡಿ, ನಮ್ಮ ಜೊತೆಗೆ ಸೇರಿ.
ಒಂದು ರೈತನ ಹಕ್ಕು ಉಳಿಸಲು ನಿಮ್ಮ ಸಹಕಾರ ಬೇಕಾಗಿದೆ. ಪಾರದರ್ಶಕತೆ ನಮ್ಮ ಬುನಾದಿ — ಪ್ರತಿ ರೂಪಾಯಿಯ ಬಳಕೆಯೂ ಸಾರ್ವಜನಿಕವಾಗಿ ಲೆಕ್ಕ ಕೊಡಲ್ಪಡುತ್ತದೆ.
ಪಾಲುದಾರರಾಗಿ →ಈ Portal ಹುಟ್ಟಿದ್ದು ಒಂದೇ ದಿನದಲ್ಲಿ ಅಲ್ಲ. ಎರಡು ದಶಕಗಳ ಕಾನೂನು ಅಭ್ಯಾಸದ ಅವಧಿಯಲ್ಲಿ, ಎಷ್ಟೋ ಬಾರಿ ರೈತರು ನನ್ನ ಬಳಿ ಬಂದು, "ಸಾರ್, ನನ್ನ ಭೂಮಿ ಹೋಗುತ್ತಿದೆ, ಏನು ಮಾಡಬೇಕು ಗೊತ್ತಾಗುತ್ತಿಲ್ಲ" ಎಂದು ಕೇಳಿದ್ದನ್ನು ಕೇಳಿದ್ದೇನೆ. ಮಾಹಿತಿಯೇ ಶಕ್ತಿ, ಮತ್ತು ಆ ಶಕ್ತಿ ಸಾಮಾನ್ಯ ರೈತನ ಕೈಗೂ ತಲುಪಬೇಕು ಎಂಬ ನಂಬಿಕೆಯಿಂದ boomihakku.org ಹುಟ್ಟಿದೆ.